CEBU, Philippines — Mirehistro og 22 puntos si kanhi All-Star point guard Isaiah Thomas, apan dili kini igo aron tabangan ang bag-o niyang koponan nga Los Angeles Lakers nga mudaog batok sa Dallas Mavericks, 123-130, kagahapon didto sa American Airlines Center sa Dallas, Texas.
Kini ang unang duwa ni Thomas sa Lakers human ang 'blockbuster trade' niadtong Biyernes diin gibuhian siya sa Cleveland Cavaliers.
Sikit ang duwa diin si Thomas ang mibida sa scoring sa Lakers human siya miiskor og 16 puntos sa first half. Hinuon wala sila kasagang sa pagbuto sa opensa sa Mavericks nga gibidahan ni veteran star Dirk Nowitzki nga mihimo og 22 puntos.
Ang Lakers laraw unta nga mosakmit sa ikalima nilang sunod-sunod nga daog ug muduol sa ikawalong dapit sa Western Conference.
Ang Lakers nga miduwa nga wala na ang duha ka batan-on nilang prospects nga sila si Fil-American Jordan Clarkson ug Larry Nance Jr. kinsa atoa na sa Cavs, nakakita og kaabag ni Thomas sa scoring nga mao sila si Brandon Ingram ug Kyle Kuzma nga nagkumboya og 33 puntos. (BANAT NEWS)