CEBU, Philippines — Sa tuyo nga matarong ang ilang kampanya sa Asean Basketball League (ABL), ang Alab Pilipinas mikuha og duha ka high-scoring PBA imports nga sila si Justin Brownlee ug Henry Walker.
Dili maayo ang sugod sa kampanya sa Alab ni coach Jimmy Alapag kay nagbitbit sila og 1-3 nga baraha, lakip na ang duha ka pilde gikan sa mga kamot sa defending champion Hong Kong Eastern Lions nga gibidahan ni Christian Standhardinger.
Si Walker maoy ipuli ni Reggie Okosa, samtang si Brownlee maoy ihulip ni Ivan Johnson.
Sila si Okosa ug Johnson wala kaayo makatabang sa Alab. Wala usab sila kahatag og suporta sa mga lokal sama nila ni Ray Parks Jr, Josh Ubiztondo ug Dondon Hontiveros.
Paningkamotan sa Alab nga makaduwa ang duha ka import sa sunod nilang sangka batok sa Malaysia Dragons sa Enero 3. (BANAT NEWS)