CEBU, Philippines - Gibuhian sa Mahindra Floodbuster ang ilang leading scorer nga si Alex Mallari ug gibaylo ngadto sa NLEX Road Warriors bugti nila ni Glenn Khobuntin ug Eric Camson.
Si Mallari usa sa mga sinaligan sa Mahindra, apan miaslom ang relasyon niini sa coach niining si Chris Gavina tungod sa dili maayong dagan sa PBA Commissioner's Cup.
Ang 30-anyos nga si Mallari mi-average og kapin sa 20 puntos sa miaging All-Filipino Cup, apan mikunhod ang produksiyon niini nga aduna na la’y 12.2 points matag duwa sa Commissioner’s Cup.
Bisan pa niini, ang NLEX nga wala pa’y daog sa Commissioner's Cup positibo nga makauyon si Mallari sa sistema ni coach Yeng Guiao ug mahimo kining usa sa lig-on nilang hinagiban samtang padayon sila nga nagpalig-on.
Si Guiao dugay nang nanginahanglan og scorer ug si Mallari maoy tubag niini.
(BANAT NEWS)