CEBU, Philippines - Si Bradley Weiss sa South Africa nakasugakod sa naglagiting nga kainit sa panahon ingon man sa malisud ug tungason nga rota dayon na ngadto sa paglangkat sa ikaduha niyang sunod-sunod nga titulo sa Xterra Philippines Off Road Triathlon series.
Taliwala sa tanang mga pagsulay nga iyang naagian, si Weiss nagpabilin nga madasigon aron dominahon ang Xterra Danao kagahapong adlawa didto sa Coco Palms beach resort sa dakbayan sa Danao. Siya sab maoy naghari sa Xterra Albay sa miaging tuig.
Gitapos ni Weiss ang makutas nga lumba nga naglangkob og 1.5K swim, 40K mountain bike ug 10km trail run sud sa tulo ka oras ug 16 minutos. Labaw siya og siyete minutos ni Sam Osborne sa New Zealand (3:23:33) nga maoy mitapos sa ikaduhang dapit.
Ang kababayan ni Osborne nga si Kieran McPherson maoy na-3rd sa oras nga 3:24:27 samtang ang Australyanong si Ben Allen, bisan og nahiyosan og ligid sa iyang bisekleta tulo ka higayon, nakamaneho gihapon pagtapos sa ikaupat nga puwesto sa oras nga 3:44:26. Ang Amerikanong si Will Kelsay maoy ikalima sa oras nga 3:50:48, samtang ang pambato sa Sugbu nga si Joseph Miller mikapyot sa ikaunom nga puwesto sa oras nga 3:52:04.
Sa women's pro division, ang Austrian nga si Carina Wasle maoy gikoronahang hara human miposte sa labing paspas nga oras nga 4:07:49. Iyang gipangpilde sila si Penny Slater sa Australia (4:36:21) ug ang Amerikanang si Jessica Koltz (5:22:53) nga maoy miangkon sa nagsunod nga duha ka puwesto. (EBV) (BANAT NEWS)