CEBU, Philippines - Gipun-an sa GlobalPort Batang Pier ang kasakit sa Mahindra Floodbuster, 105-86, nga padayun sa ilang losing-streak sa PBA Commissioner's Cup kagabii didto sa Smart Araneta Coliseum.
Sa maong kadaugan ang Batang Pier misalbar sa ilang tsansa sa playoffs pinaagi sa pagsakmit nila sa ikaduhang daog sa pito ka duwa, samtang ang Floodbuster padayun sa pagtibugsok sa ilang 1-7 nga baraha.
Balanse nga opensa ang gipakita sa GlobalPort dihang unom ka mga players ang mirehistro og double-figures sa pagpangulo ni Stanley Pringle nga adunay 24 puntos, samtang ang import nga si Malcolm White ug Gilas cadet nga si Von Pessumal adunay 18 ug 14 puntos matag usa.
Wala gyud kaporma ang Mahindra batok sa GlobalPort dihang gipauwanan dayun sila og tres sa nauwahi rasun nga nagukod sila sa tibuok duwa. Mas hugot usab ang depensa sa Batang Pier ngadto sa mga scorer sa Floodbuster ilabi na sa local shooter nga si Alex Mallari.
Gikan sa 49-36 nga labaw sa halftime, ang GlobalPort miinat sa labaw ngadto sa 22 puntos, 80-56 sa hinapos nga bahin sa third period ug gikan didto wala na nila lingia pa ang Mahindra.
Nangulo sa pilderong Mahindra mao si import Keith Wright nga adunay 24 puntos. (LPM) (BANAT NEWS)