CEBU, Philippines - Usa ka talagsaong karera sa baroto nga gibansagan og “Balik Baroto Regatta” ang molamas sa selebrasyon sa ika-72 nga anibersayo sa makasaysayanong Talisay Landing karong Marso 26.
Gipasiugdahan sa Balik Baroto Movement hapit na usa ka dekada, ang maong lumba salmotan sa dul-an 100 ka mga mananagat gikan sa nagkadaiyang dapit sa Sugbo. Duna sa’y mga entrante gikan sa Leyte ug ingon man sa Lala, Lanao del Norte.
“Nagatuo ko nga kining atong kalihukan daku og ikatampo sa programa ni Presidente Rodrigo Duterte alang sa mga kabus gumikan kay naghatag ni’g importansiya niadtong mga wala kaayo matagad nga sektor sa atong katilingban,” matud pa ni Balik Baroto Movement founding chairman Dir. David ‘Kuya’ Boy S. Odilao, Jr.
Ning tuiga, dul-an sa 50 ka parisan sa mga mananagat ang mopakita’g aksiyon sa taas nga lumba nga naglangkob og pito ka milya sugod diha sa Larawan Beach Resort sa Poblacion, dakbayan sa Talisay.
Ang mga partisipante mobugsay dayon ngadto sa Pooc diin sila mo-U-turn sa unang higayon duol sa Corona del Mar subdivision. Moderitso paingon sa South Road Properties alang sa katapusan nilang U-turn sa kadagatan atbang sa SM City Seaside sa dili pa sila mobalik sa Larawan resort.
Miabot ngadto sa P330,000 nga ganti ang gitagana ngadto sa mga mananaog ning dalaygon nga kalihukan nga gipaluyohan sa kagamhanan sa Talisay ubos sa liderato ni Mayor Eduardo ‘Eddiegul’ R. Gullas, inabagan sa Office of the Presidential Assistant for the Visayas pinaagi ni Sec. Michael Lloyd Dino, Tuburan LGU ubos ni Mayor Democrito ‘Aljun’ Diamante Jr. ug Fraternal Order of Eagles (Philippine Eagles).
Ang makampiyon mobulsa og P50,000, samtang ang mopahiluna gikan sa ikaduha hangtod sa ikalimang dapit modawat og P40,000, P30,000, P20,000 ug P10,000. Dunay consolation prize nga P5,000 matag usa ngadto sa motapos gikan sa ikaunom hangtod sa ika-10 ug P2,000 matag usa alang niadtong mahuman gikan sa ika-11 hangtod ika-50 nga dapit.
Duna say special awards alang sa labing nindot nga mga baroto: P25,000 sa 1st, P20,000 sa 2nd, P15,000 sa 3rd, P10,000 sa 4th, ug P5,000 sa 5th placers. (BANAT NEWS)