CEBU, Philippines - Paningkamuton sa New Millennium Hardware nga masakmit ang una nilang korona sa Los Amigos Basketball Association, usa sa labing karaang ballclub dinhi sa Sugbo.
Ang New Millennium Hardware nga gipanag-iya ni Gil Gollon makigsangka sa Luke Genesis sa finals karong Lunes sa alas-8:30 sa gabii diha sa Barangay Banilad gym, dakbayan sa Mandaue.
Sa dili pa ang pinaksitay sa duha ka magribal, magsangka una ang Monterroyo/Co-Jordan nilang Dr. Raul Monterroyo ug Richard Jordan ug ang Top V ni Tophe Villalon alang sa ikatulong puwesto nga gikatakda sa alas-7 sa gabii.
Ang New Millennium Hardware unang nakasud sa finals niadtong miaging semana human gitagak ang Monterroyo/Co-Jordan, samtang ang Luke Genesis ni Telly Herbieto maoy miangkon sa katapusang luna pinaagi sa pagpilde sa Top V.
Hinuon, ang Luke Genesis maoy inilog kay kausa lang kini napilde sa 11 nila ka duwa.
Ubos sa pagpangulo sa tandem nilang Tawing Grafe ug Canjo Echavez, ang New Millennium Hardware makalaum sab sa idlas nilang si Lloyd Chavez, Ariel Ocier, Eman Pacquiao ug Adie Cinco. Andam sab nga mosuporta silang Gilbert Sebandal, Lou Ornopia, Cris Ubas sa ilang opensiba.
Samtang ang Luke Genesis magsalig sab sa duo nilang Richard Lawas ug Ramie Suson uban nilang Vincent Herbieto, Ryan Barba ug Jebart Bartin. (BANAT NEWS)