CEBU, Philippines - Aduna na’y upat ka teams ang nipadayag sa ilang partisipasyon sa labing una nga torneyo sa Cebu Legends Basketball Association (CELBA) Christmas League 2016 nga tentatibong gikatakda sa Disyembre 10 didto sa Housing covered court sa Barangay Canduman, dakbayan sa Mandaue.
Matud pa ni CELBA interim president P/Insp Armil ‘Dondon’ Coloscos, nga padayon pa gihapon sila nga modawat og mga miyembro nga nagpangedaron og 40-anyos pataas.
Magpadayon sab gihapon ang practice game sa bag-ong ballclub matag adlaw nga Miyerkules ug Sabado gikan sa alas-6 hangtod sa alas-10 sa gabii sa nahisgutang covered court.
Gipatin-aw ni P/Insp Coloscos nga mga miyembro nga makaapil og labing menos duha ka practice session sugod niadtong miaging semana hangtod unya sa Disyembre 3 awtomatik na nga makaduwa sa unang liga sa CELBA.
Niadtong interesado nga magpa-miyembro sa CELBA mahimong motawag/text ni P/Insp. Coloscos sa 09235767419.
Mahimo sab nga motunga sa practice game karong gabii sa alas-6 hangtod sa alas-10 sa gabii.
Sa laing bahin, ang CELBA mipili og interim officers diin si P/Insp Coloscos maoy nahimong temporaryo nga presidente.
Lain pang napili mao si Engr. Tony Alcover (vice president), Jade P. Coloscos (secretary), Jerome (treasurer), SPO2 Jennifer Velasco ug SPO2 Racy Tion (peace officers).
Sila si Lloyd Chavez, Wilfredo Medillo ug Richard Limosnero maoy mga collectors.
Ang BOD naglakip nila ni Alfredo Cabiluna, Joel Magale, Arnulfo ‘Opong’ Englis, Joel Cabahug, Elmer ‘Merot’ Ygoña, Noel Ferolino ug Romeo Yares. (BANAT NEWS)