CEBU, Philippines - Upat ka koponan gikan sa Sacred Heart School-Ateneo de Cebu Magis Eagles ang miabante sa finals sa tagsa-tagsa nila ka mga sporting event sa nagpadayong Jesuit Athletic Meet 2016 kagahapon didto sa Ateneo de Davao University sa Davao City.
Ang Lady Magis Eagles miharos sa tanan nilang kaatbang sa volleyball lakip na ang 25-15, 25-21, 25-16 nga kadaugan batok sa host team Ateneo de Davao. Wala usab magpauwahi ang SHS-Ateneo girls futsal team nga mipilde sa Ateneo de Davao-A, 6-4. Giharos usab nila ang tanan nilang duwa sa elimination.
Sa boys basketball, ang SHS-Ateneo Team 1 milubong buhi sa ilang Team 2, 85-31 sa semifinals. Ang boys football team sa SHS-AdC mipaluhod usab sa Xavier University/Cagayan de Oro, 4-1, gisundan sa 4-0 nga kadaugan batok sa Ateneo de Manila.
Sa laing bahin, si Gerard Rona mitunol og silver medal sa SHS-Ateneo boys singles sa tennis, samtang ang Magis Eagles mirehistro usab og 4-4-3 gold-silver-bronze medals sa swimming. (BANAT NEWS)