CEBU, Philippines - Gipakauwawan sa gagmay, apan abtik nga E-F Surplus ang mas dagku nga Union Galvasteel pinaagi sa pag-iskor og daog, 70-63 sa kutas kaayo nila nga duwa sa JJ Surplus Ballclub 6th Conference basketball tournament niadtong Sabado didto sa Talit’s Garden open court sa Tayud, Lilo-an.
Gipangulohan gihapon sa team owner niining si Fury Trazona ang E-F Surplus nga mibalik og taak sa kinatas-ang dapit sa standing bitbit ang 7-1 nga baraha.
Ang one-time MVP nga si Fury bisan tuod og gipresyur ug si Anton Tranghia parehong mirehistro og 14 puntos sa E-F Surplus nga wala gyud mokompiyansa human nila mailog ang labaw sa third period.
Mipakita sab og maayong labok si Ken Nuñez diin miiskor kini og 11 puntos aron makatabang sa tungason nga kadaugan sa E-F Surplus.
Ang Union Galvasteel gipangulohan sab ni Bobong Tiongzon nga miburak og 15 puntos, si Jhoe Gellocane miamot og 13 puntos, samtang si Lito Dejarme miabuno’g 11 puntos.
Sa laing duwa, ang J/J Surplus nagsandig sa abilidad ni Larry Oroyan aron ilubong ang Northern Energy, 76-61.
Si Oroyan miratsada og 30 puntos aron mangu sa opensa sa J/J Surplus nga maoy midiktar sa tibuok duwa.
Mikiat sab og maayo si John Henry Agbon aron moiskor og 15 puntos alang sa J/J Surplus nga wala’y hunong mirumbo sa undermanned nga Northern Energy.
Duha sab ka players sa Northern Energy ang miiskor og double figures. Si E. Tiongzon mipabuhagay og 33 puntos ug si Tagalog nga adunay 10 puntos.
Ubos sa bendisyon sa ilang presidente nga si Henry Agbon, ang liga gidumala ni commissioner Fury Trazona inabagan nilang Chang Tejero, Arman Gonzaga ug Choy Pilapil.
PUNTOS MATAG USA
Unang duwa:
E-F Surplus (70) Fury 14, Tranghia 14, Nuñez 11, A. Sabang 6, Caballes 6, Layese 6, Llamedo 6, C. Sabang 4, Betinol 4, Vallejos 4.
UNION Galvasteel (63) – Tiongzon 15, Gellocane 13, Dejarme 11, Gestopa 8, Labustro 5, Boyles 4, Capin 3, Judaya 2, Mantos 2.
Ikaduhang duwa:
J/J Surplus (76) – Oroyan 30, JH Agbon 15, Hayahay 7, B. Echiverre 6, Antipuesto 4, J. Reyagbon 4, Astellero 4, J. Echiverre 2.
NORTHERN Energy (61) – Tiongzon 33, Tagalo 10, Marjo 8, Notarion 6, Acabo 2, Jerome 2.