CEBU, Philippines - Nanganti si Pinoy’ng boksidor Johnreil ‘Cuadro Alas’ Casimero (22-3, 14KOs) nga mohimo og impresiyon sa dihang modepensa siya sa iyang IBF flyweight title batok sa wa’y pildeng Briton nga si Charlie Edwards (8-0, 2KOs) karong adlawa didto sa O2 Arena sa London, England.
Ang sangka nilang Casimero ug Edwards usa sa undercards sa giatngan nga middleweight unification bout tali sa eksplosibong si Genady Golovkin ug Kell Brook.
Si Casimero wala mabalaka nga moaway na sab siya sa teritoryo sa iyang kontra kay anad na man siya niini.
Gani siyam sa katapusan niyang 11 ka away nahitabo gawas sa nasud, apil na didto sa Argentina, Mexico, Thailand, Panama, China ug South Africa diin giharos kini niya og daog.
“Kabawo nako sa iyang estilo ug preparado kaayo ko aning awaya,” sumala pa sa garbo sa Ormoc atol sa usa ka chat sa Facebook. “Buhaton nako tanan kutob sa akong mahimo aron madepensaan akong bakus.”
Ang 26-anyos nga si Casimero manalipod sa labing unang higayon sa IBF title nga iya gisakmit human gipukan ang kanhi wa’y pildeng Thai champ nga si Amnat Ruenroeng atol sa IBF Convention niadtong Mayo didto sa Diamond Court sa Beijing, China.
Iyang harungon si Edwards nga moaway man tuod sa iyang balwarte, apan wala pa’y igong kasinatian ug labaw nang wala pa makabagat og boksidor nga susama og kalibre ni Casimero. (BANAT PALARO)