CEBU, Philippines - Ang MJE Inside Edge mao gyu’y nakaangkon sa katapusang luna sa semifinals pinaagi sa pagpilde sa SSK Abelgas, 86-82 sa nanghinapos nga liga sa Bond of Master Basketball League 3rd Conference niadtong Domingo didto sa Alta Vista gym sa Pardo, ning dakbayan sa Sugbo.
Ang kadaugan sa MJE Inside Edge maoy mikompleto sa Final Four uban sa Wellas Fresh Chicken, EJ Fitness Gym ug sa Barbeque Boss nga midaog sab sa ilang duwa niadtong Domingo batok sa Horizons Auto Parts, 94-77.
Mismo ang team manager nga si JC Engracial maoy nangu sa iyang koponan nga miburak og 28 puntos, laing tulo niya ka batos nga sila si Ron Miscala, Julz Montillano ug Victor Pacquiao ang miamot og 10 puntos matag usa.
Nangulo sa SSK Abelgas mao si Clark Abelgas nga mikamada og 24 puntos, gisundan ni CV Abelgas nga adunay 21 puntos ug Echang Royeras sa iyang 14 puntos.
Sa laing bahin, si Jayvan Arradaza mipupo og 12 puntos, samtang sila si Glen Montillano, Baki Ceniza ug Ted dela Victoria parehong mitikdol og 10 puntos alang sa Barbeque Boss nga yano kaayong miabante sa semifinals.
Si Dulf Antolijao miratsada og 29 puntos aron pangulohan ang Horizon Auto Parts, samtang sila si Choi Tarongoy ug Neil Nadela nagkumbinar og 29 puntos.
Ang semifinals himuon karong gabii diin magsangka ang MJE Inside Edge batok sa Wellas Fresh Chicken, samtang ang EJ Fitness Gym makighamag sa Barbeque Boss. Ang modaog maoy magtigi sa kampiyonato karong Sabado.
Ang liga nahimo pinaagi sa paningkamot ni Jun ‘Master’ Tan ug sa tanang miyembro sa maong ballclub. Ang mga duwa gipadagan ni Edwin ‘Paw’ Dejacto Jr. (BANAT PALARO)