CEBU, Philippines - Aron pagdugang og kahulogan sa selebrasyon sa adlaw sa kinaugalingnan karong tuiga, ang Cebu Holdings, Inc. ug Ayala Center Cebu inabagan sa R.O.X. mopasiugda og usa ka fun bike ride alang sa maanindot nga kawsa.
Giulohan og ‘Heroes Bike Out’, ang charity event gikatakda karong Hunyo 29, gikan sa alas-6 hangtod sa alas-8 sa buntag ug magsubay kini og rota nga dunay distansiya nga sayes kilometros libot sa Cebu Business Park sugod sa Terraces grounds atbang sa Krispy Kreme.
Atol sa press conference kagahapon sa Kpub BBQ, si Ayala associate marketing manager Ian Joplin Virrey nagkanayon nga ilang gibana-bana nga maabot ngadto sa 150 ka mahiligon og biseklita ang mosalmot sa ilang fund-raiser alang sa HERO Foundation, usa ka non-profit organization nga naghatag og pinansiyal nga suporta alang sa edukasyon sa mga anak sa mga mitaliwan nga mga sundalong Pinoy ug kadtong naparalisa samtang naa sa linya sa ilang trabaho.
Ang rehistrasyon nagkantidad og P200, apil na niini ang event shirt, snacks ug ingon kahigayonan sa pagdaog sa raffle. Kadtong gusto moapil o sa dugang mga detalye, mahimong mobisita sa Ayala Concierge nga anaa sa Level 1 duol sa Bench o motawag sa 266-2535. (BANAT PALARO)