CEBU, Philippines - Si J.J. Barea miayag og 27 puntos, samtang si Dirk Nowitzki nakamugna og usa ka maayong depensa aron pag-agak sa Dallas Mavericks ngadto sa 88-86 nga kadaugan batok sa Houston Rockets sa usa ka krusyal nilang duwa sa NBA Western Conference kagahapon didto sa American Airlines Arena didto sa Dallas, Texas.
Ang Mavericks miinat sa ilang rekord ngadto sa 40-38 ug ang lima na ka sunod-sunod nilang daog maoy nakahatag nila og duha ka duwa nga bentaha batok sa Rockets (38-40), ang karibal nila sa Southwest Division dayon na ngadto sa katapusang upat ka duwa sa regular season.
Mahinungdanon kaayo ang maong kadaugan gumikan kay ang Mavericks ug Rockets nagtabla man ug ang Utah Jazz alang sa katapusang duha ka luna sa playoffs sa West. Nilang tulo, ang Rockets maoy angayan nga manikaysikay og maayo gumikan kay natagak sila sa ikasiyam human mapilde og unom sa katapusan nilang siyam ka duwa.
Didto sa Portland, ang Trail Blazers hingpit nang nakakuha og luna sa playoffs sa dihang ilang gipakgang ang Oklahoma City Thunder, 120-115. Wala hinuon maapektohi ang Thunder kay sud na man sila daan sa playoffs.
Samtang ang Indiana Pacers nga padayong nakigbisog aron makasud sa Eastern playoffs uban sa Detroit Pistons ug Chicago Bulls, mipahayag sa ilang tsansa human ilang gipahimuslan ang wala pagduwa ni LeBeron James aron paglansang og 123-109 nga kalampusan batok sa Cleveland Cavaliers.
Gumikan sa maong daog, ang Pacers nagpabilin sa ikapitong puwesto sa East, apan tunga sa usa ka duwa lamang ang ilang labaw sa Detroit Pistons, nga mipukan sa Magic sa iskor nga 108-104 didto sa Orlando. (BANAT NEWS)