CEBU, Philippines - Mipatuasik og 37 puntos si Klay Thompson, samtang si Stephen Curry mitusak og 34 puntos nga nakabawos sa ilang makauuwaw nga kapildihan karon nga season pinaagi sa pagpilde sa Portland Trail Blazers, 128-112 sa ilang duwa sa National Basketball Association kagahapon didto sa Oracle Arena sa Oakland, California.
Ang kadaugan miinat sa ilang record regular-season home winning streak ngadto sa 47 ka duwa. Sila si Curry ug Thompson nagkumbinar og 15 for 25 sa ilang 3-pointers ug mihimo’g 26 of 45 overall. Si Thompson nakig-uban na karon ni Curry isip mga players nga duna na’y 200 ka three-pointers sud sa upat ka sunod-sunod nga seasons.
Miiskor sab sila’g labing menos 30 puntos sa usa ka duwa sa ikaunom nga higayon sa ilang careers.
Si Draymond Green midugang og 17 puntos uban ang 13 ka rebounds ug pito ka assists.
Si CJ McCollum miiskor og 18 puntos alang sa Portland, kinsa mihimo'g 19 ka three-pointers ug milabaw sa Warriors nga nakahimo’g 18 ka tres nga nahimong usa ka rekord alang sa duha ka team nga mikolekta og 37 ka tres sa ilang 37 for 76 shooting.
Sayo nga gibiyaan sa Warriors ang TrailBlazers ug gusto kini nila lubngon og maayo aron makabawos sa ilang 32 puntos nga pilde, 105-137 niadtong Pebrero 19 didto sa Portland.
Si Damian Lillard, kinsa mibalik didto sa iyang gigikanan sa Oakland, mihimo’g 17 puntos, apan misipyat siya og 15 sa unang 17 niya ka tirada. (BANAT PALARO)