Mipanaw na ang eskrima legend nga si Supreme Grand Master Ciriaco "Cacoy" Cañete kaniadtong Pebero 5 sa edad nga 96 anyos.
Si Cacoy maoy usa sa original nga founder sa Doce Pares Club niadtong 1932 uban sa laing pito ka igsoon lakip ang labing unang president for life nga maguwang ni Cacoy nga si Eulogio "Yoling" Cañete.
Isip pagtamud ni Cacoy, ako unang ipagawas dinhi sa SPORTSgab ang mensahe sa iyang anak nga babaye nga si Catherine "Kitty" Cañete-Knight nga tua sa Estados Unidos ug mi-post sa facebook aron makahibawo ang uban nga mga sakop sa Doce Pares sa nagkalain-laing dapit sa America, Europe ug sa Australia.
Apan tungod kay Binisaya man ang Banat, dili mahimong pinulongan sa Ingles ang ikarga.
Si Cacoy dili lang kay usa ka eskrimador, author ug instructor apan usa siya ka komedyanteng higala nga maoy hinungdan nga bisan nakasabot sila sa kamatayon ni Cacoy tungod sa pangedaron, kadaghanan kanila ang miangkon nga mingawon sila sa mga komedya ni Cacoy ug usahay gani ilang sultihan ang nauwahi nga magsuwat sab og libro alang sa ilang mga jokes.
Mipahibawo ang iyang anak nga namatay si Cacoy sa 8:08 ang takna ug sulagma kini kay ang iyang adlaw'ng natawhan Agosto 8 diin ang Agosto maoy ikawalong buwan sa tuig.
Gikatakda nga ilubong ang patay'ng lawas ni Cacoy karong adlawa human sa requiem mass sa ala una sa hapon diha sa San Nicolas Parish Church dili layo sa ilang panimalay ug headquarters sa Doce Pares diha sa dan C. Padilla, ning dakbayan.
Dunay 21 gun salute atol sa iyang lubong tungod kay si Cacoy usa man ka reserve sa military nga dunay ranggo nga Kapitan. Usa sab siya ka kanhi instructor sa Criminology sa University of the Visayas.
Ang iyang tinun-an nga Australian Grandmaster nga si Vince Palumbo, usa ka martian arts instructor ug tag-iya sa International Combative Martial Arts Academy kon ICMA nga tua magbase sa Adelaide, Australia, maoy usa sa labing suod nga hidala ni Cacoy.
Si Vince maoy kanunay motawag kang Cacoy nga Supremo ug Gwapo. Tungod kay mahiligon man sab sa musika og maayong mokanta si Cacoy kay mga musikero man ang mga Cañete, si Cacoy lang sab maoy makapakanta sa labing yabag og tingog nga langyaw niyang tinun-an ug usa na niini si Palumbo ug ingon man sab ang usa ka higala nga si Bruce Cunningham nga taga Fort Wayne, Indiana, USA.
Si Cacoy nakadawat na og daghan na kaayong Hall of Fame awards sa nagkalain-laing lugar sa kalibotan nga iyang nabisitahan aron pagsangyaw ug pagpalambo sa eskrima, ang giilang orihinal nga matang sa self-defense gikan pa sa panahon ni Lapulapu, ang bayani nga Sugboanon.
Matod pa ni Palumbo sa iyang mensahe, gisakitan sila sa kamatayon ni Cacoy kay susama ra sab siya sa ilang amahan. Dili kuno niya hikalimtan si Cacoy, ang tawo nga nagtudlo kaniya'g eskrima sukad pa sa 30 na ka tuig ang milabay.
Dili Sir o boss ang itawag ni Vince ngadto kang Cacoy kun dili Manong tungod sa iyang respeto sa nauwahi.
Usa si Vince sa 11 ka mga foreign grandmasters nga 11th grader nga mihimo og tribute atol sa necrological services sa alas otso ang takna kagabii didto sa St. Peter's Chapel sa dan Imus, ning dakbayan.