CEBU, Philippines - Gidominaran sa mga Sugbuanong Brazilian Jiu jitsu practitioners ang first Jiu jitsu Federation Visayas Regional Open didto sa Cebu City Sports Center niadtong miaging adlaw.
Si April Comeros sa 90/EIGHT BJJ misakiyo og duha ka gold medals sa female under 60 kgs ug sa female white/blue belt absolute.
Ang teammate ni Comeros nga si Arnel Ylanan miangkon sa gold medal sa male under 62 kgs, samtang si Dreamer Hong milabni sa silver ug si Chad Gutierrez sa Fabricio BJJ mibulsa sa bronze medal.
Gawas sa 90/EIGHT BJJ, laing Cebu-based team nga Overlimit BJJ misidlak usab dihang naka-gold si Jaco Immanuel Lucero sa male under 69 kgs class, samtang si Dominic Miala mipatigbabaw sa male under 85 kgs.
Ang pambato sa Deftac San Carlos City nga si Maria Aisa Ratcliff miangkon sa gold medal sa female under 50 kgs , samtang sila si Katrina Viagedor ug Glaiza Tangaha pulos gikan sa Overlimit BJJ nagsunod sa ikaduha ug ikatulong dapit.
Namawi hinuon alang sa Overlimit si Eva Marie Gamboa human siya nahimong gold medalist sa female under 55 kgs. (BANAT NEWS)