CEBU, Philippines - Midaku ang kahigayonan sa University of San Jose-Recoletos (USJ-R) Jaguars nga moabante sa top four human nila paniti ang University of Southern Philippines Foundation (USPF) Panthers, 83-69 sa 1st Capt. Raul Cabanero Inter-sitio Basketball League niadtong Miyerkules sa gabii didto sa Bulacao Sports Complex, sa dakbayan sa Talisay.
Ang Jaguars nga kasamtangang nagtangag og 3-1 nga baraha, gipangulohan ni Ralph Dinolan, kinsa mikadlit og 21 puntos, gisundan ni Rick Peromingan sa iyang 16 puntos ug Edmundo Bayhonan nga adunay 14 puntos.
Tulo sab ka players sa Panthers ang miiskor og double figures pinangulohan ni Clyde Avancena nga mitikdol og 12 puntos. Sila si Winston Bolivar ug Lyndon Colina parehong mitimang og 10 puntos.
Sa Inter-sitio division, ang South Game milubong sab sa Upper Central sa iskor nga 87-72.
Sa laing bahin, ang topseed nga University of the Visayas (UV) Green Lancers mosukod sa abilidad sa bisitang koponan Sta. Ana Bacolod College sa usa ka exhibition game.
Sugdan kini karong alas-6 sa gabii sa dili pa ang regular game tali sa University of San Carlos (USC) Warriors ug USJ-R Jaguars sa alas-8.
Ang maong kalihukan gipasiugdahan ni Bulacao Brgy. Capt. ug Talisay City ABC president Raul Cabanero. Gisuportahan sab kini sa Bulacao Barangay Council ug sa SK Task. Ang mga duwa gipadagan nilang konsehal Banjo Abastillas, Darwin Cabanero ug Agnes Lastimosa, ingon man sa CEBRA nga gipangulohan ni CESAFI head referee Edwin Dejacto Sr. (BANAT PALARO)