CEBU, Philippines – Si Marc Nicole Suson maoy labing unang Sugbuanon nga nakapanso og tiket ngadto sa finals sa 10th Cebuana Lhuillier Age-Group Tennis Tournament kagahapon didto sa Alta Vista Golf and Country Club.
Kini human si Suson nakaeskapo batok ni seeded no. 3 Jose Mari Casino, 7-5(5), 7-6(5) sa kulbahinam nilang boys 16 semifinal match. Sunod niyang sangkaon ang modaog sa engkuwentro tali nilang Jose Maria Pague ug Duma Hakim Boloto.
Pabiling nanginit si Pague human iyang gipakuratan ang topseed nga si Vince Tugade, 6-2, 7-5 sa quarterfinals, samtang si Boloto miabante sab human gipakgang si Jace Unto, 6-3,6-3.
Wala hinuon kaugpo si Pague sa boys 18 human siya giparot sa Sugbuanong si Jan Godfrey Seno, 5-7, 6-4, 10-7.
Gawas ni Seno, sila si Vince Tugade, Boloto ug John Clyde Laquio miabante sab ngadto sa semis. Si Tugade mipakaging sa Sugbuanong si Norman Joseph Enriquez, 6-2, 6-4, si Boloto mipukan ni Kevin Pantillo, 6-4, 6-1, samtang si Laquio mipilde ni Suson, 6-2, 6-2.
Didto sa CitiGreen Tennis Resort, sila si Kurt Bandolis ug Heinz Carbonilla maoy magtige alang sa unisex 10-under title. Si Bandolis mipasibat ni Aaron Kevin Tabura sud sa deciding set, 1-4, 4-0, 4-0, samtang si Carbonilla yanong miposte og 4-0, 4-2 nga daog batok ni Mitch Largo. (BANAT NEWS)