CEBU, Philippines – Ang Sugbuanong si Richard Pugoy Gonzales, nga maoy No.1 table tennis player karon sa nasud, mipahayag sa iyang kampanya sa kampiyonato human midaog sa ikaupat niyang duwa aron pag-abante ngadto sa Final Eight knockout stage sa 888sport World Championship of Ping Pong 2016 didto sa Alexandra Palace sa London, England.
Human gitumba ang lig-ong kontra gikan sa France ug China, ang 44-anyos nga si Gonzales mipukan ni Filip Mlynarski sa Poland, 2-0 (15-10, 15-10), ug dayon gipabakwit si Russian Dmytry Popov sud sa tulo ka sets, 15-12, 11-15, 15-7.
Gumikan niini, si Gonzales mi-asdang sa quarterfinals diin iyang ikasangka mao si Andrew Baggaley sa England, nga miabante sab human gitagak si Paul McCreery sa Nothern Ireland, 15-9, 15-9.
Ang lain pang mga quarterfinalists mao sila si Andrew Rushton sa England, Lubomir Pistej sa Slovakia, Maxim Shmyrev sa Russia, Gavin Rumgay sa Scotland, Christopher Doran sa England ug Alexander Flemming sa Germany.
Sa iyang pagtunob sa quarters, si Gonzales garantisado nga modawat og $3,000 nga motubo pa ngadto sa $5,000 kun iyang mapilde si Baggaley.
Ang labing nindot nga nakab-ot ni Gonzales sa maong torneyo nahitabo niadtong tuig 2014 sa dihang siya mibira og bronze medal human mapilde ni Maxim Shmyrev sa semifinal. (BANAT NEWS)