CEBU, Philippines – Nagbunga og maayo ang panagpares nilang Reyden Colina ug Delay Baltonado human ilang gipukan silang Kenneth Garrido ug Jojo Morados, 2-1, sa kulbahinam nilang kampiyonato aron pagdominar sa bag-ohay pang natapos nga Sinulog Cup darts tournament didto sa Yayoy's Grill and Resto Bar.
Sila si Garrido ug Morados maoy nidaog sa pasiunang duwa sa ilang best-of-three finals human sila mitali og double eight.
Wala hinoon magpaalkansi si Colina human siya milansang og double 30 aron pagpuwersa og sudden-death Game 3.
Sa decider, nagmadaugon silang Colina ug Baltonado human si Colina mipaksit og double 20 nga igo kaayong nakapapas sa double 16 nga natali ni Morados.
Sa laing bahin, sila si Eugene Managuit ug Acidic Marriot mibuntog nilang Alvin Reyes ug Jerous Ponce aron pagpahiluna sa ikatulong dapit.
Samtang si Mon-Mon Alcoseba, nga maoy nag-organisa sa maong torneyo, nalandig sa ikalimang puwesto uban ni Jojo Galvez. (BANAT NEWS)