CEBU, Philippines – Ang Sugbuanang si Aaliyah Ricci Mataragnon ug ang Bol-anon nga si Paul Jumamil nga nagrepresentar sa Rider Omega Pro maoy nanghawod sa tagsa-tagsa nila ka mga kategoriya sa 2nd Cebu City Triathlon kagahapon didto sa Cebu City Sports Center.
Ang 15-anyos nga si Mataragnon sa Jumbo Plastic Lenoleum maoy gikoronahang hara sa women's elite division human siya miguwang labing paspas sud sa usa ka oras, 18 minutos ug nuybe segundos.
Biya kaayo ang nagsunod kaniya nga si Jacqui Lamparero sa Iloilo nga mipatak lamang og oras nga 1:19:55, samtang si Cianyl Gonzalez sa Rider Omega Pro maoy nalandig sa ikatulong dapit sa oras nga 1:23:32.
Sa men's division, si Jumamil maoy nanghawod sud sa oras nga 1:04:43. Si Kim Remolino maoy na-second sa oras nga 1:05:39 ug gisundan kini nilang Jorry Ycong (1:05:47), Emmanuel Commendador (1:06:09) ug Ralph Eduard (1:08:37).
Samtang sa mga age-groupers, misidlak silang Welmar Saavedra ug En Torres (25-29), Chris Capistrano (30-34), Jeffrey Codino ug Zuzette Jarina-Co sa Metafit Tri Team (35-39), Chobie Duenas ug Karen Manayon (15-19), Alex Donrey Noval (20-24), Rumolo Rosell ug May Ann Mares (40-44), ug Brian Lim ug Lalaine Sacris (50-above).
Ang team nilang Aileen Guardo, Ariel Genobiagon ug Ryan Galo maoy nagmadaugon sa relay event. (BANAT NEWS)