CEBU, Philippines – Miabante sa semifinals ang duha ka batan-ong Cebuano tennis players nga sila si Aaron Kevin Tabura ug Mitch Largo kagahapon sa pagpadayun sa 10th Cebuana Lhuillier Age Group Tennis Tournament-Cebu leg didto sa CitiGreen Resort sa Punta Princesa, ning siyudad.
Ang siyete anyos nga si Tabura, apo sa usa sa mga iladong coach sa Sugbu nga si Fritz Tabura, miabante sa semifinal round sa unisex 10-under human ang kulbahinam nga 4-1, 0-4,5-3 nga kadaugan batok ni Francis Plopenio Jr.
Determinado nga miduwa si Tabura human siya mapilde sa first round sa boys 12 batok ni Ralph Adrian Selmar, 6-1,6-4.
Sa iyang bahin, si Mitch Largo miangkon og sayun nga kadaugan batok ni Chad Connor Cuizon, 4-0, 4-2, aron makuha iyang semis berth sa unisex 10-under.
Si Selmar igo lang gipatungtong sa second round human gilatos siya ni Heinz Aslan Carbonilla, 0-6, 0-6. Namawi hinuon iyang igsuon nga si Rainer Angelo Selmar kinsa midaog 7-5, 6-2 batok ni Pete Harly Liquit.
Misulod usab sa sunod round si Harland Hogan human niya gipilde si Richard Milgo, 6-1, 6-1. (BANAT NEWS)