CEBU, Philippines – Hingpit nang misulod sa PBA ang Phoenix Petroleum human sila milampos pagpalit sa PBA franchise sa Barako Bull Energy.
Kini ang ikaduhang pagsuway sa Phoenix nga motikang sa PBA human sila gi-deny sa liga sa ilang aplikasyon niadtong 2011.
Si PBA chairman Robert Non mianunsiyo kagahapon nga nagkasinabot na ang mga sakop sa board nga tugtan ang Phoenix nga mopalit sa Barako franchise.
Sa pagpalit nila sa Barako franchise, mapunta sa Phoenix ang tibuok coaching staff ug players sa Energy rason nga dili sila maglisud sa una nilang season sa liga.
Ang Barako nga gibidahan nila ni JC Intal, RR Garcia, Josh Ubiztondo, Willy Wilson, Mick Pennisi ug Mac Baracael misulod sa quarterfinals sa Philippine Cup sa wala pa sila tagaka sa GlobalPort Batang Pier. (BANAT NEWS)