Kanunay gihisgotan sa NBA ilabi na gyud kadtong mga fans sa Golden State Warriors ang ilang tinguha nga tablahon ang 1996 regular-season record sa Chicago Bulls nga 72-10 o di ba hinoon maghimo og kaugalingon nilang record nga 73-9 o labing lisud 74-8.
Gani pipila ka semana na ang milabay dihang wala gyud makatilaw og pilde ang Warriors, tanang buka sa baba sa mga Warriors fans naneguro gyud nga malabwan gyud ang record nilang Michael Jordan, Scottie Pippen ug Dennis Rodman.
Apan alang sa kasayuran sa tanang mga Sugboanong NBA fans, ipa-ambit sa SPORTSgab ngadto sa atong mga higala kung gi-unsa paghimo nila ni Jordan ang 72-10 record aron matabangan ang mga suki natong basketball fanatics paghulma o mag-umol sa kaugalingon nilang opinion.
Sa wala pa mahimo ang 72-10, mao kini ang gisubay nga dan sa Bulls ug kamo nay bahala motubag kung mas maayo ba ang Warriors kung itandi sa Bulls.
Wala kita masayod kung pila una ka winning streak ang gihimo sa Bulls sa pagsugod sa season kay lahi ang gitawag og "start of the season" apan sa primero nilang 44 ka duwa, ang ilang record 41-3. Karon, ang Warriors sa ilang unang 41 ka duwa, duna na sila'y record nga 37-4.
Human sa ilang 41-3, mihimo ang Bulls og 55-4 record ug dinhi pa lang daan, lupig na ang Warriors kinsa adunay 37-4 ug kung imong ibana ang 55 sa 37, biya og 18 ka daog ang Warriors. Busa kamong mga Warriors fans nagtuo gihapon kamo nga mas maayo ang Warriors kay sa Bulls? Kana kung wala kamo mamakak, Warriors gyud maoy inyong itubag.
Akong balikon sa makausa pa nga kung magtandi kita'g mga players, atong itandi position by position ug era by era. Dili nato itandi si Stephen Curry kang Larry Bird kay layo ra gyud kaayo. Bird-Curry? Chicken-Curry naa. Kaniadto nga hilabihang kapisikal sa duwa, kanunay champion ang Boston Celtics ug kanunay makigsinuntokay si Bird kang Bill Laimbeer, ang usa sa labing malditong player of all time nga sakop sa Detroit Pistons.
Karon, mosukol ba og pisikalan nga duwa si Curry nga kadaghan sa iyang libreng tirada tungod man kay dunay gihatag nga screen dili parehas ni Bird nga atubangan gyud sa kamot sa nagdepensa mo-itsa. Mas daghang siya'g three-pointers sa usa ka season kung itandi ni Kobe Bryant apan tungod kay una man sa duyan si Kobe, mas daghan siya'g championship ring.
Ang labing tinuod sa akong tan-aw wala man gyud kaayo maghinambug ang Warriors kung dili ang ila man mga fans ilabi na kadtong mo-post dayon nga naka-igo og tres si Curry may lima ka tiil gikan sa team logo. Alang nako ngano man diay og kalima pa siya mohimo niana matag duwa unya pilde gihapon mas maayo tingali bahala'g dili daghan og tres basta daog maoy maayong ipanghambug.
Sumala pa sa record, human sa 37 ka duwa sa miaging tuig, ang Warriors mihimo'g 31-6 ug dayon 36-9 nga dili layo sa 38-7. Posible gyud kunong mabuak ang record sa Bulls.
Kung akoy pasultion, dili. Ilang ikasangka ugma ang Cleveland nga nagpanikad nang mobawos sa ilang kapildehan didto sa Oracle Arena dili pa lang dugay kay lagi tua na man sab sa Cleveland ang duwa. Human niana, ilang ikasangka ang Chicago sa Enero 21 ug ang Indiana sa Enero 23 ug human sa ilang Eastern road trip, mo-host sila sa San Antonio Spurs unya sa Enero 26.
Dunay nakigpusta kanako nga fan sa Warriors nga wala seguro'y gamit sa kwarta nga P30 mil man gyu'y ipusta akong gi-ingnan ginagmay lang ang akoa ug didto lang sa uban kung wala gamit inyong kwarta. Ipusta lang na sa uban ug huwata lang kung unsaon paggasto sa taga Spurs ang ilang daog.
Balik sa pagsuway pagbuak sa 72-10 record, nasayud ba kamo mga higala nga sa tibuok buwan sa Enero niadtong 1996 wala gyud mapilde ang Bulls og 14 ka duwa? Unya karon tunga-tunga pa lang kita sa Enero kapila na man mapilde ang inyong Warriors? Duha na.
Duha pa lang... and counting.