CEBU, Philippines – Si International Master Kim Steven Yap ug lain pang duha nagsawo sa liderato human sa lima ka hugna sa 1st Cebu Muslim-Christian Friendship Open Chess Tournament niadtong Sabado sa Chessmoso Chess Club diha sa Colonnade Mall sa may dalan Colon dakbayan sa Sugbu.
Si Yap, nga maoy nagpadagan sa Cebu School of Chess kansang tuyo mao ang paghashas sa mga batan-ong talento aron mamahimong kampiyon sa umaabot sama kaniya, mipukan ni NM Rogelio Enriquez aron pagmugna og three-way tie tali nilang FIDE Master Anthony Makinano ug Michael Joseph Pagaran bitbit ang managsamang 4.5 puntos.
Si Makinano, kanhi Palaro gold medalist, mipakgang ni Edcel Montoya, samtang si Pagaran miwani ni NM Elwin Retanal.
Nagtabla sa ikaupat hangtud sa ikapitong dapit bitbit ang 4.0 puntos mao sila si Allan Salientes, Yves Fiel, Carlos Moreno III ug Ronald Ganzon.
Samtang nagdagan gikan sa ikawalo hangtud sa ika-15 nga puwesto mao sila si E. Retanal,Felix Shaun Balbona, Diego Caparino, E.Montoya, Enriquez, Edsel Vosotros, Elmer Sumngat ug NM Merben Roque nga dunay 3.5 puntos matag usa.
Ang duha ka adlaw nga torneyo nga gipasiugdahan sa Association of Cebu Muslim Professionals and Entrepreneurs, Inc. (ACMEP) agi'g pagtambayayong sa Cebu Executives and Professionals Chess Association (CEPCA) mitagana og dul-an sa P30,000 nga ganti alang sa mga mananaog diin ang makampiyon mobulsa og P8,000. (EBV) (BANAT NEWS)