CEBU, Philippines – Ang tadhang mga putbolista sa Don Bosco Technology Center milabnot og dugang duha ka titulo sa Sinulog Football Festival didto sa ilang balwarte kagahapon.
Human gidominar ang boys under-13, under-15 ug unisex under-7, ang Bosconians nanghawod na sab, ning higayona sa under-9 ug men's 45-above category.
Ang DBTC mibira sa korona sa under-9 human gibuntog ang ilang sister-team Don Bosco Barca, 2-0.
Samtang ang DBTC Alumni mibihag sa ilang kaatbang gikan sa Abellana National School aron pag-aswat sa tropeyo sa 45-above class.
Sa men's open, ang University of San Carlos maoy mipatigbabaw human gipukan ang University of Southern Philippines Foundation, 1-0.
Ang Paref-Springdale maoy nakampiyon sa boys 18 human gipakaging ang USPF, 2-0, samtang ang Tayud FC maoy milangkat sa kampiyonato sa girls class human gilupig ang San Roque FC, 1-0.
Sa girls 15, ang St. Theresa's College maoy gikoronahang hara. (BANAT NEWS)