CEBU, Philippines – Ang topseed nga si Johnny Arcilla yano kaayong mipakaging sa tagilungsod niining Sugbuanon nga si Jaime Catteo sud
sa duha ka sets aron pagmartsa ngadto sa ikatulong hugna sa Peugeot Philippine Tennis Open-Cebu leg kagahapon
didto sa Cebu Country Club.
Si Arcilla, usa sa labing dugay nga miyembro sa Philippine team sa Davis Cup ug walo ka higayon nga nakampiyon sa prestihiyosong PCA Open, nanginahanglan lamang og 30 minutos aron pagmakmak ni Catteo, 6-1, 6-0.
Ang pag-apil ni Arcilla sa torneyo kabahin ra unta sa iyang preparasyon alang sa national finals, apan nausab na karon ang timplada sa iyang kampanya kay si Francis Casey "Nino" Alcantara, usa sab ka tadhang Davis Cupper ug usa sa labing maayong tennis player sa nasud, mitaak man sab dinhi sa Sugbu aron moduwa.
Gumikan niini, gipangagpas karon sa kadagdahan ang eksplosibong final match tali nilang Alcantara ug Arcilla. Dili hinoon sila angayan nga mokompiyansa gumikan kay ang ubang contenders andam man mopakgang sa ilang gilaraw.
Si Arcilla makigharong sunod ni Marc Nicole Suson, samtang ang garbo sa dakbayan sa Cagayan de Oro City nga si Alcantara moduwa pa sa labing unang higayon batok ni Hector Toledano apan kini ubos na sa ikaduhang hugna. Si Suson mi-abante human gipalagpot si Clyde Dale Bienes.
Ang ig-agaw hinoon ni Clyde nga si Mike Bienes buhi pa ang kampanya sa titulo human gilampurnas si Royen Cabunilas, 6-3, 6-2.
Sud sab sa sunod nga hugna mao sila si Norman Joseph Enriquez, Calvin Chung, Ralph Julianne, Alvin Labastida, Jan Godfrey Seno, Jose Maria Pague, Franklin Encarnacion ug Marc Pradel. (BANAT NEWS)