CEBU, Philippines – Plansado na ang tanan alang sa pagpahigayon sa 1st Captain Raul Cabanero Cup Inter-collegiate basketball tournament nga mosikad karong Domingo diha sa Bulacao gym, dakbayan sa Talisay.
Unom ka teams ang mopakita’g aksiyon sa maong torneyo nga pangulohan sa 15th CESAFI champion University of San Carlos (USC) Warriors ug runner-up University of the Visayas (UV) Green Lancers.
Laing upat mao ang University of San Jose-Recoletos (USJ-R) Jaguars, University of Cebu (UC) Webmasters, University of Southern Philippines Foundation (USPF) Panthers ug ang J. Espina Wildcats.
Atol sa managers/coaches meeting kagahapon sa buntag didto sa Sunburst-Mango nga pinangulohan ni Bulacao Brgy. Capt. Raul Cabanero nga dili na lang bahinon ang teams sa duha ka bracket.
Ang mga partisipanteng koponan mosubay og single round format diin ang top four maoy moabante sa crossover semifinals. Ang no. 1 moharong sa no. 4 ug ang no. 2 makigbatok sa no. 3. Ang modaog maoy mag-abot sa kampiyonato ug ang mga mangapilde mag-ilog alang sa ikatulong dapit.
Ang mokampiyon mobulsa og P50,000, ang runner-up modawat og P30,000.
Mopahiluna sa ikatulo makaangkon og P20,000, samtang ang motungtong sa ikaupat nga dapit makadawat og P10,000.
Mitambong sab sa maong tigum mao si league commissioner ug councilor Banjo Abastillas, deputy nga si councilor Darwin Cabanero, committee on sports sa barangay Bulacao nga si Agnes Lastimosa, UC manager Atty. Baldomero Estenzo, USC athletic director Rev. Fr. Andriano Ocariza, ug mga coaches nga sila si Allan Cabatingan sa USPF, Jun Noel sa USJ-R, Gary Cortes sa UV ug Bembem Alcaraz sa J. Espina Wildcats.
Unang magsangka sa alas-7 sa gabii mao ang UC Webmasters batok USPF Panthers ug dayon ang USC Warriors batok sa J. Espina sa alas-8:30 sa gabii.
Ang mga duwa pagadumalaon sa Cebu Basketball Referee Association (CEBRA), Inc. pinangulohan ni CESAFI head referee Edwin Dejacto Sr.