CEBU, Philippines – Nangangkon ang Rain or Shine Elasto Painters nga anaa kanila ang ‘momentum’ ug taas ang ilang kompiyansa nga maoy mopatigbabaw sa “best-of-seven” semifinal series batok sa San Miguel Beermen.
Human makatabla sa series, 1-1 atol sa Game-2, ang Rain or Shine mosuway pagsakmit sa 2-1 nga bentaha sa Game-3 karong alas-5 sa hapon didto sa Smart Araneta Coliseum.
Ang Painters dominanteng midaog sa Game-2, 105-97 diin miabot ilang labaw og 22 puntos.
Gumikan niini, si coach Yeng Guiao nagtuo nga anaa gyud nila ang mas epektibong estilo sa opensa nga maoy mahimong yawi sa ilang kalampusan batok sa defending champion nga Beermen.
Napakita sa Painters ang ilang balanseng opensa, diin dili lang usa o duha ka players ang ilang gisaligan nga moiskor.
Hinuon, gawas sa ilang scoring, ang Painters subling motutok karon sa depensa diin gusto ni Guiao nga luyahon sa iyang mga bigmen si reigning MVP JuneMar Fajardo.
Problema unya kaayo sa Beermen kun maluya na si Fajardo ilabi na nga kini ang sentro sa ilang opensa.