CEBU, Philippines – Pakyas ang Mahindra Enforcers pagkuha sa usa sa mga labing dominanteng import nga miduwa sa PBA nga si Puerto Rican PJ Ramos alang unta sa ilang kampanya sa Commissioner’s Cup.
Ang Mahindra desperado nga makuha ang labing una nilang playoff appearance sunod conference ug naunhan pa sila sa ubang expansion teams nga NLEX Road Warriors ug Blackwater Elite nga misulod sa playoff sa 2015 PBA All-Filipino Cup.
Ang 7-foot-4 nga si Ramos nahimong sinaligang import sa Kia (karon Mahindra) sa miaging season diin nag-average kini og 35.9 points ug 21.2 rebounds, apan dili na kini mobalik isip import sa koponan.
Hinuon, wala kini magpasabot nga huyang ang Mahindra sunod nga conference tungod kay gikuha nila ang NBA D-League veteran nga si Augustus Gilchrist nga adunay gitas-on nga 6-foot-10.
“He is very excited and can’t wait to come and play here”, matud pa sa agent ni Gilchrist nga si Sheryl Reyes sa The Philippine STAR, ang igsuong mantalaan sa Banat News.
Sama sa papel ni Ramos sa miaging season, si Gilchrist maoy sandigan sa Mahindra sa scoring ug rebounding. (BANAT NEWS)