CEBU, Philippines – Naalarma, apan wala mabalaka si Alaska Aces coach Alex Compton human sila gipilde sa GlobalPort Batang Pier sa Game-1 sa ilang best-of-seven semifinals series kagahapon didto sa MOA Arena.
Ang Aces nga napilde, 93-107, nanganti nga mobawos sa Game-2 karong gabii didto sa Smart Araneta Coliseum.
Wala mapugngi ni Compton nga mopadayag sa iyang bilib ngadto sa superstar sa Batang Pier nga si Terrence Romeo, kinsa mihimo og career-high 41 puntos, apan nagtuo siya nga dili unta makahimo og ingon ani kadaku nga scoring output si Romeo kun hugot pa lang ang ilang depensa.
Ning higayona, ang Alaska dili na molugak sa ilang depensa sama sa ilang gibuhat sa Game-1 diin gilubong sila sa GlobalPort sud sa tulo ka kuwarter sa wala pa sila misuway og apas sa final period.
Sa iyang bahin, si Gilas Pilipinas cager Romeo miingon nga giandam na niya ang iyang kaugalingon sa buhaton unyang hugot nga depensa sa Alaska ngadto kaniya. (BANAT NEWS)