CEBU, Philippines – Gipagawas sa korte sa sayong bahin sa duwa si veteran coach Gregg Popovich, apan bisan pa niini nakahimo gihapon sa pagdaog ang San Antonio Spurs batok sa Minnesota Timberwolves, 101-95 kagahapon didto sa AT&T Center sa San Antonio, Texas.
Si Popovich kapila nakiglalis ug naningka sa mga officials atol sa duwa tungod kay wala siya kauyon sa mga tawag ug miresulta sa technical fouls nga hingpit nga mipalagpot kaniya sa duwa.
Hinuon, sa pagkawala ni Popovich, wala maibani ang kaagresibo sa Spurs nga gipangulohan ni Kawhi Leonard, kinsa mibubo og 17 puntos ug milangkat og 11 ka rebounds, samtang ang rookie nga si Boban Marjanovic miiskor usab og 17 puntos.
Sa maong kadaugan, ang Spurs pabiling wa’y pilde sud sa 18 ka duwa sa ilang homecourt karon nga season diin aduna sila’y 27-6 win-loss record sa Western Conference.
Ang Spurs lakip karon sa kasaysayan uban ang 1978 Portland TrailBlazers ug 1986 Houston Rockets isip mga koponan nga mibukas sa ilang season nga adunay 18-0 home record.
Nakahimo ang Spurs paglabni sa maong rekord bisan pa og milingkod ang ilang sinaligan nga si Tim Duncan, kinsa mipahuway tungod sa nagsakit niining tuhod. (BANAT NEWS)