CEBU, Philippines – Gitiwasan sa Megabond Aluminum Cladding ang Dorma, 56-55, sa Game-2 sa ilang best-of-three finals aron paglangkat sa kampiyonato sa Architects+Engineers Basketball Association’s 1st Corporate Cup niadtong Sabado sa gabii didto sa University of San Carlos main gym.
Si Loreneil Tequin mao na sab ang mihandos sa Megabond ngadto sa kadaugan human mitali og 15 puntos, unom ka rebounds ug tulo ka assists, samtang si Malvin Malicdem miamot og 11 puntos, upat ka rebounds, tulo ka assists ug tulo sab ka steals.
Si Tequin maoy giyukboan nga Finals MVP human mirehistro og average nga 17.5 puntos, pito ka rebounds, 2.5 steals ug usa ka block matag duwa.
Nabugnaw ang opensa sa Megabond human milabaw og 13 puntos sa halftime, 33-20, apan nakasugakod kini sa nagkayong endgame rally sa Dorma aron makaipsot.
Sa laing bahin, ang Fenestram Fabricators nagmaya sab human sila maoy mipahiluna sa ikatulong dapit. (BANAT NEWS)