CEBU, Philippines – Gitapos ni Cianyl Jamae Gonzales ang iyang kampanya ning tuiga pinaagi sa usa ka tam-is nga kadaugan sa women’s division sa 1st Tri Liloan sa miaging adlaw didto sa Liloan, Cebu.
Si Gonzales, kinsa bag-o lang mibalik og lumba human makasugat og injury sa milabay’ng buwan, mitapos sa lumba sud sa duha ka oras, 53 minutos ug 13 segundos aron maangkon ang women's title.
Gisundan siya ni Denise Abcede sa oras nga 3:16:34 ug si Lucille Ruiz nga mioras og 3:35:18.
Mikompleto sa top five mao sila si Genevive Balleras (3:46:39) ug Michelle Garcia (4:22:42).
Sa iyang bahin, ang Boholano nga si Paul Jumamil maoy naghari sa men’s division sa oras nga 2:04:56. Sila si Jory Ycong (2:09:58) ug Emmanuel Comendador (2:16:21) maoy miokupar sa ikaduha ug ikatulo nga dapit. Nalandig sa ikaupat ug ikalima mao silang Welmar Saavedra ug Ralph Arche.
Sa age group, si Joseph Miller midaog sa 35-39 class title sa oras nga 2:24:31, samtang si Jundeb Andre Esquivel midominar sa 30-34 division sa oras nga 2:51:31 ug si Reylan Lapiz milabni sa 24-under title sa oras nga 2:38:18.
Lain pang naghari sa age-group mao sila si Jan Carlo Cañete (25-29), Alejandro Suelo (40-49), Brian Lim (50-above), samtang ang trio nila ni Loren Dale Echavez, Elmer Navarro ug Noel Tillor midaog sa relay event. (BANAT NEWS)