CEBU, Philippines - Ang giatngan nga sangka sa mga kampiyon tali sa garbo sa Sugbo nga University of
San Carlos (USC) Warriors ug hari sa UAAP nga Far Eastern University Tamaraws sa Final Four
sa 2015 PCCL National Collegiate Championship banatan na karong adlawa didto sa The Arena
sa San Juan City.
Orihinal untang gikatakda nga magharong ang Warriors ug ang Tamaraws kagahapon
ingon man ang Letran Knights ug San Beda Red Lions sa laing semifinal pairing, apan ang duha ka
duwa gikanselar gumikan sa kusog nga ulan nga gidala ni bagyong Nona nga mibatil sa Metro
Manila.
Karon nga nikalma na ang unos, magharong na ang Warriors ug ang Tamaraws sa
main game sa alas 4:00 sa hapon, human sa duwa tali sa Knights ug Red Lions sa dinumtanay
nga ‘rematch’ sa NCAA finals sa alas 2 sa hapon.
Sukwahi sa Tamaraws nga atomatik miabante sa Final Four isip UAAP champions, ang
Warriors ni coach Bong Abad nag-agi usa sa mga kamot sa duha ka tadhang Manila teams sa
wala pa misaka sa semifinal round.
Human nakaeskapo batok sa National University (NU) Bulldogs, ang reigning Cebu
Schools Athletic Foundation, Inc. (CESAFI) champion mipakugang sa University of Sto. Tomas
(UST) Growling Tigers, 82-72, aron pagduso og eksplosibong gubat batok sa Tamaraws.
Sa gihapon, si Shooster Olago mao ang sandigan sa Warriors, kansang liderato
gikinahanglan og maayo sa iyang koponan. Aron makalahutay sa torneyo, obligado nga moambag
kaniya sila si Charles Pepito, Ian Tagapan, Nico Magat, Ian Ortega, Victor Rabat ug ingon man
ang hait nilang three-man guard rotation nilang Gio Laguyo, Keifir Lim ug Christian Maconodico.
Bisan og dili mabitin ang ilang line-up, bug-at gihapon nga tahas ang pas-anon sa
Warriors batok sa dekalibreng Tamaraws nga gipangulohan sa ilang power five nga gilangkuban
sa 6-foot-8 Nigerian import nga si Prince Orizu uban nilang Russel Escoto, Roger Ray Pogoy,
Ron Dennison ug Achie Iñigo.
Lawom sab ang bench sa Tamaraws nga gilangkuban nilang Raymar Jose, Richard
Escoto, Rey Mark Belo, Monbert Arong ug Mike Tolomia.
Hinuon, matud pa sa karaang panultihon nga lingin ang bola. Kun ugaling modaog,
gawas nga mapahayagan ang ilang tsansa nga sakmiton ang P1 million nga ganti, segurado na sab
nga ilang matupngan ang labing taas nga nakab-ot sa usa ka Cebu team sa maong torneyo nga
gihuptan sa University of the Visayas (UV) Green Lancers human sila na-second sa Ateneo Blue
Eagles niadtong tuig 2007. (BANAT NEWS)