CEBU, Philippines – Mipakita na sa talagsaong kapaspas si Philippine National Youth Games-Batang Pinoy national champion Ana Patricia ‘Ica’ Maximo aron masakmit ang women juniors 18-under category sa Cebu Criterium.
Si Maximo sa YKKBikes.com mitapos sa lumba sa oras nga 29 minutos ug 27 segundos diin gipilde niya ang triathlete nga si Aaliyah Mataragnon ug si Artem Enario.
Sa maong kadaugan, ang 16-anyos nga si Maximo mibulsa og P5,000 nga mao na’y labing daku niyang premyo nga nadawat sa usa ka female rider sa kasaysayan sa mga cycling race sa Sugbo.
“I’m so excited I was able to pull it off. Racing with men helped my confidence. I raced patiently during
the early part of the race and just coasted along with the others,” matud pa niya.
“We are very grateful to Keith DeFeibre for organizing this race not only for men but especially for women and juniors with equal prizes for both genders,” dugang pa sa two-time SAC Cebu Sports awardee ug grade 10 student sa Sacred Heart School-Hijas de Cebu.
Sa laing bahin, ang top three finishers sa men’s open mao sila si Oscar Rindole sa Nueva Ecija, John Mier sa Cebu ug Christian Cabonita, samtang sila si Keith DeFeibre sa USA, Philip Sainz ug Rolando Pagnanawon mao ang midaog sa men’s 45-above.
Si Jonel Carcueva mao ang hari sa men’s 19-44 class, samtang si Yuan Chiongbian sa men’s junior 18-under. (BANAT NEWS)