CEBU, Philippines – Nanginahanglan pa og double overtime ang Barangay Ginebra San Miguel una nila mapukan ang Blackwater Elite,102-94 aron makaangkon og luna sa playoffs sa PBA Philippine Cup kagabii.
Inay sayon nga idispatsar ang Blackwater, naglisud hinuon ang Ginebra gani wala sila makalabaw og double-digits hangtod nga miresulta sa overtime, 84-all.
Pabor na untang modaog ang Blackwater dihang gi-foul ilang sentro nga si Jason Ballesteros sa katapusang kuwatro segundos, apan wala kapasud bisan usa ka free-throw. Dili usab igo ang gihatag nga dugang singko minutos sa overtime dihang nagbinayloay og puntos ang duha ka koponan nga mihatod sa duwa ngadto sa ikaduhang overtime human magtabla, 92-all.
Apan sa double-overtime, nakabuwelo ang Ginebra dihang nanulod ang mga tres nila ni LA Tenorio ug rookie Scottie Thompson alang sa 100-94 nga labaw sa katapusang 1:21 sa duwa. (BANAT NEWS)