CEBU, Philippines - Si Kenyan Douglas Mwiti milampos pagdepensa sa iyang korona sa men's division sa Historic Resort City Marathon didto sa dakbayan sa Lapu-Lapu kagahapon, apan si Lizane Abella maoy mihimo sa labing dako nga kasikas gumikan kay gilangkatan og titulo sa Preciosa Sanchez sa women's division.
Gitapos ni Mwiti ang makutas nga 42.195 ka kilometero nga karera sud sa duha ka oras, 51 minutos ug 9.080 segundos. Iyang gibuntog ang iyang kababayan nga si Albert Omboga, samtang sila si Paul James Zafico (2:58:33), Eric Chepsiror Kibiwote (3:15:37) ug Dodong Vosotros sa Ormoc (3:15:37) maoy mikumpleto sa top five finishers.
Sa women's division, si Abella sa Ked Runner's Club mipakurat ni Sanchez human siya mirehistro og oras nga 3:52:04.020. Si Sanchez miposte og oras nga 3:55:09.26, nga igo gihapon kaayong naghatud kaniya sa ikaduhang puwesto, samtang si Sandra Sollano maoy na-3rd sa oras nga 3:55:10. Ang nagsunod nga duha ka luna giangkon nilang Tessie Escasinas (4:46:23.42) ug Rosalinda Cosino (4:47:22).
Sa iyang bahin, si Ruffa Sorongon nagpabiling kampiyon sa women's 21K sa oras nga 1:45:59.640, samtang naghari sa men's class mao si Azlan Pagay sa oras nga 1:20:11.
Lain pang mga mananaog mao sila si Robert Daang (35:04.82) ug Saralee Cuizon (47:50.24) sa 10K ug sila si Michael Largo (16:51) ug Irish Delechos (23:16) sa 5K. — (BANAT NEWS)