CEBU, Philippines - Human sa swimming, ang mga atleta nga naglangkob sa Team Cebu City nagmangtas na sab, ning higayona sa weighlifting event sa Visayas leg sa Philippine National Games didto sa Antique.
Sa kinatibuk-an, ang TCC weightlifters mihakot og 11 ka gold medals, siyam ka silvers ug unom ka bronzes.
Sila si Earl John Peter Bagano ug Apple Ayaron nanghawod sa tagsa-tagsa nila ka mga kategoriya aron pagpugnit og tagurha ka gold ug usa ka silver.
Nakabira sab og tag-duha ka golds ug usa ka bronze silang Kevin Renzo Nisnisan ug Doren Romeral. Lain pang nakadaog og bulawang medalya mao sila si Kelly Kay Rojas, Gary Hortelano ug Rufino Iba III.
Parehong naka-silver sila Christopher Bureros ug Jefferson Querubin ug ingon man si Jelly Mae Pederes.
Duha sab ka silvers ang naangkon ni Kurt Kuffka Abala, si Cheryl Cuico adunay usa ka silver ug usa ka bronze, samtang si Arvin Iba nakatampo og bronze medal.