CEBU, Philippines - Giangkon sa University of San Carlos (USC) ang sayong labaw sa Cebu City Olympics human maghari sa swimming event kagahapon didto sa Cebu City Sports Center.
Human sa duha ka adlaw nga aksiyon sa swimming, ang mga Carolinians mikolekta og 15 ka gold , pito ka silver ug pito ka bronze medals.
Ang elementary division maoy mibaswat sa USC sa ilang lima ka golds, walo ka silvers ug lima ka bronzes. Ang Maria Montessori International School nga nangulo sa Unit 8 maoy nagsunod sa ilang 5-8-5 medal tally ug sa Unit 7 sa ilang 3-gold, 1-silver ug 1-bronze medal finish.
Napuhalan sa UC ang USC sa secondary division human sa ilang 11 ka gold, siyam ka silver ug lima ka bronze medals, samtang ang nauwahi adunay 7-4-5 gold-silver-bronze medal finish.
Ang Cebu City Olympics mosikad sa sunod semana, apan sayong gisugdan ang ubang events gumikan kay ang Team Cebu City molarga man paingon sa Antique sunod semana alang sa ilang kampanya sa Visayas qualifying leg saPhilippine National Games.