CEBU, Philippines – Mihimo na sab og laing NBA milestone si Cleveland Cavaliers star LeBron James dihang ang iyang kusog nga dunk batok sa Philadelphia Sixers nakahimo kaniya nga labing batan-ong player nga nakatigom og 25,000 points.
Ang 30-anyos nga si James nagkinahanglan lang og 21 puntos aron makab-ot ang 25,000 points kagahapon didto sa Philadelphia ug iya kining nahimo sa oras nga 8:06 sa fourth period.
Si James miposa’g 22 puntos atol sa ilang 107-100 nga kadaugan didto sa Wells Fargo Center, ang korte sa Sixers.
Sa kinatibuk-an, si James nakahimo na’g 25,001 puntos sa batan-on niyang career.
Si James maoy ika-20 nga player sa kasaysayan sa NBA nga mirehistro na og 25,000 career points.
Si Kobe Bryant maoy labing dali nga nakakab-ot sa maong plateau nga nahimo niya niadtong 2010 sa edad nga 31- anyos.
Lakip sa mga aktibong players nga nakahimo sa maong rekord sa ilang career mao ang German star sa Dallas Mavericks nga si Dirk Nowitzki, Tim Duncan sa San Antonio Spurs ug ang kanhi mga Boston Celtics stars nga silang Kevin Garnet ug Paul Pierce.
Ang Australian guard sa Cleveland nga si Matthew Dellavedova maoy mihimo sa pinasulbong nga assists ngadto kang James aron makab-ot ang maong milestone.
Si Mo Williams midugang og 21 puntos alang sa Cavs, kinsa aduna na karo’y 3-1 nga baraha.
Ang forward nga si Kevin Love miposa og 15 puntos ug may walo ka rebounds.
Ang Cavs nabiyaan unta og labing menos 15 puntos, apan ilang na-outscore ang Sixers, 25-4 sa second ug third periods.
Sa lain pang mga duwa, ang Houston Rockets midaog batok sa Oklahoma City Thunder, 110-105 ubos sa pagpangulo ni James Harden, kinsa mikulit og 37 puntos.
Silang Dwight Howard ug Ty Lawson midugang og 16 ug 14 puntos matag usa alang sa Rockets.
Ang Thunder gipangulohan nilang Kevin Durant ug Russell Westbrook kinsa mibahog og 29 ug 25 puntos matag usa.
Midaog sab ang Milwaukee Bucks batok sa Brooklyn Nets, 103-96, ang Portland Trailblazers mitumba sa Minnesota Timberwolves, 106-101.
Mihipos sab og daog ang L.A. Clippers batok sa Phoenix Suns, 102-96 ug ang defending champion Golden State Warriors milubong og 50 puntos sa Memphis Grizzlies, 119-69. (BANAT NEWS)