CEBU, Philippines – Nakaeskapo bitbit ang 73-68 nga kadaugan ang Lakers sa kulbahinam nilang duwa batok sa Monterroyo sa second conference sa LABA President’s Cup 2015 basketball tournament niadtong Biyernes didto sa Banilad Sports Center, Mandaue City.
Lubong og nuybe puntos, 11-2 sa ‘back-to-back’ triples ni Florentino Ecot sa sayong bahin sa first period, apan ang Lakers misukli sab og mga puntos aron mapapas ang labaw sa Monterroyo, 18-16 pagtapos sa maong kuwarter.
Mitubo pa ang labaw ngadto sa 10 puntos, 32-22 sa tira ni Ramon Alburo sa 4:20 ang oras nga nahabilin sa second quarter.
Si Marcial Marturillas namawi sa bati niyang performance sa miaging duwa dihang mihakot siya og 19 puntos aron pangulohan ang Lakers pagpukan sa Monterroyo.
Epektibo sab ang duwa ni Raymundo Carvajal, kinsa mihabwa og 15 puntos, samtang mikiat sab si William Oljol nga miantog og siyete puntos alang sa kadaugan sa Lakers.
Nailog pagbalik sa Monterroyo ang labaw, 48-47 kortesiya sa free throws ni Rex Gonzaga sa third quarter, apan didto ra kutob ang maayong performance kay ang Lakers mihimo’g solidong depensa uban ang nagtuasik nga mga puntos hangtod nga nakalabang sila sa mga pagsuway.
Ang Monterroyo ni playing coach Dr. Raul Monterroyo gipangulohan ni Tawing Grafe, kinsa mipabuhagay og 22 puntos, samtang si Gonzaga miamot og 14 puntos.
Ang duwa gipadagan ni league commissioner Geryl Bukiron, kinsa gialalayan sab nilang Lloyd Chavez, Ramil Baclay ug Allan Recla.
Ang liga namugna ubos sa pagtugot ni LABA president Gilbert Sebandal.
Puntos Matag Usa
LAKERS (73) – Marturillas 19, Carvajal 15, Oljol 7, Pestaño 6, Inocando 6, Alburo 6, Gonzaga 5, Herbito 5, Costanilla 2, Cena 2.
MONTERROYO (68) – Grafe 22, Gonzaga 14, Ecot 9, Ramos 8, Bontilao 5, Monterroyo 4, Baunsit 2, Paciencia 2, Hatamosa 2. (BANAT NEWS)