CEBU, Philippines – Buksan na karong adlawa ang 2015-2016 NBA season diin ang Cleveland Cavaliers ni superstar LeBron James maoy unang moduwa dihang ilang sulngon ang Chicago Bulls didto sa United Center sa Chicago, Illinois.
Si James, kinsa maoy nangu sa highest paid line-up, padayon gihapong nangandoy nga mahatag niya ang dugay na kaayong gidamgo nga titulo sa Cavaliers.
Ang Cavs nga usa ka $115 million squad, gihagit sa pag-alsa sa championship trophy sa Hunyo sunod tuig batok sa pipila ka mga maayong laking kaatbang ilabi na gyud sa Golden State Warriors nga maoy nakaguba sa ilang championship dreams upat na ka buwan ang milabay.
Sugdan sab sa Golden State Warriors ang ilang kampanya pagdepensa sa ilang korona batok sa New Orleans Pelicans, magsangka sab ang Detroit Pistons batok sa Atlanta Hawks. Gihamok og injuries ang Cavs atol sa finals ug karon ang 30-anyos nga si James adunay gibati nga sakit sa iyang likod ug kuwestiyonable pa kun moduwa ba siya karong adlawa.
Miabante sa ikalimang higayon sa NBA Finals si James niadtong Hunyo ug ang unang upat niini didto sa Miami Heat sa wala pa siya mobalik sa Cleveland nga iyang gibiyaan niadtong 2010.
Himsog na ang napiang nga forward nga si Kevin Love, apan wala moapil sa practice si Kyrie Irving, kinsa adunay piang sa wa'ng kneecap nga iyang nahiaguman atol sa Game-1 sa Finals.
Piangon sab si Iman Shumpert, Timofey Mozgov ug si Anderson Varejao. (BANAT NEWS)