CEBU, Philippines – Ang EVO division champion Telstra-Teletech Boomerangs hingpit nang nakatungas sa Elite Classic human gilampurnas ang Sykes Pioneers, 98-82 sa 11th CSCC E-League men’s basketball tournament niadtong Domingo sa City Sports Club-Cebu gym.
Sunod nga sangkaon sa Telstra mao ang ‘twice-to-beat’ Lexmark Stallions ug segurado nga laing bukid na sab ang ilang katkaton gumikan kay ilang ikabangga usa man sa labing lig-on nga contender sa Elite Classic.
Wa’y pagkapalong ang nagdilaab nga opensa ni Sam Jordan Hermosa nga mitapos og 38 puntos alang sa Boomerangs, kinsa mipakita nga andam na silang makiggubat sa mas lisud nga Elite Classic sunod season.
Sila si Edward Louis Acuna ug John Anthony Ares midonar og tag-12 puntos, samtang si Ryan Paul Abordonado mitali og 10 puntos alang sa Telstra nga madasigon kaayong mibangon human maalkansi og singko puntos sa unang kuwarter, 19-24.
Ang Telstra biya og singko puntos sa halftime, 41-46, apan mihimo’g 25-15 rally sa third period aron moabante na og sayes puntos, 66-60. Ila dayon nga gitak-op ang duwa pinaagi sa ilang 32-2 run nga nakapabarag sa Sykes. (BANAT NEWS)