CEBU, Philippines – Katloan ka mga arnisador gikan sa Armed Forces of the Philippines (AFP) ang ania karon sa Sugbo aron mosalmot sa unom ka adlaw nga eskrima seminar workshop nga gisugdan kagahapon didto sa Doce Pares Headquarters sa Barangay Banilad, dakbayan sa Sugbo.
Giulohan og “Train the Trainer’s Seminar”, ang session matag adlaw sugdan sa alas-9 sa buntag ug matapos sa alas-5 sa hapon. Matapos karong Oktubre 31.
Ang mga partisipante nga pulos mga Black Belt, mopaubos sa makuti nga pagbansay-bansay kabahin sa Doce Pares “multi-style” system ug ingon man sa sakto nga pamaagi pagtudlo sa maong matang sa martial art nga dinhi nagsugod sa atong nasud.
Nag-organisar sa maong kalihukan mao sila si 2nd Lt. Mario Talledo Sr. (Ret.) PA. Ang grupo sa mga sundawo nga mohashas pa og maayo sa ilang abilidad sa arnis gipangulohan ni Lt. Francis Mirabelle T. Samson (MI) PA, ang pangu sa Special Service sa Philippine Army didto sa Fort Bonifacio, nga mao sab ang head coach sa AFP Arnis Team.
Nagkanayon si Lt. Talledo nga ang ikaduhang batch sa trainees magagikan sa Philippine Air Force (PAF) ug gikatakda nga moanhi sa Sugbo sa katapusang semana sa bulan sa Nobiyembre ug pagasundan kini sa grupo gikan sa Philippine Navy (PN) nga motaak dinhi sa ikaduhang semana sa Enero 2016.
Ang kadagkuan sa Doce Pares mikuha sa dekalibre nilang mga instructors aron maoy mopahigayon sa training. Kini naglangkob nilang GM Bonifacio ‘Loloy’ Uy , GM Andres ‘Kano’ Cañete, GM Felix Gutang, Master Albert Sales, Master Jose Borces, Master Harry Talledo ug Senior Instructor Edgardo Bontuyan. Si WEKAF Executive Director Master Gerald Cañete maoy mo-supervise sa tibuok event.
Si Supreme GM Dionisio Cañete, ODL (Order of Datu Lapu-Lapu) uban nilang Doce Pares directors Judge Victor Teves, Atty. Cesar Tabotabo ug Dr. Armand Tabotabo maoy personal nga motunol sa Certificates of Participation ug ingon man sa Certificates of Promotion kun kinsa man gani kadtong kuwalipikado nga ma-promote sa mas taas nga ranggo. (BANAT NEWS)