CEBU, Philippines - Ang Barangay Casili ug Tilhaong misakmit sa kampiyonato sa tagsa-tagsa nila ka dibisyon sa 5th Mayor Teresa P. Alegado Cup Fiesta Basketball League nga bag-ohay pang nahuman didto sa Tayud gym sa Consolacion, Cebu.
Ang Casili mipakaging sa Cabangahan, 64-55 aron madepensahan ang ilang titulo sa SK Category A, samtang ang Tilhaong mipakaging sa Garing, 66-60 aron pagdominar sa SK Category B.
Human miabante og tres puntos ang Casili sa unang kuwarter, 19-16, mibulhot pa kini og maayo dayon na pag-inat sa ilang labaw ngadto sa 11 puntos, 50-39 sa nahabilin nga 10 minutos sa duwa.
Si Cyril Sabellana misalida og maayo sa Casili aron pagtapos og 17 puntos hinungdan nga siya maoy gikoronahang Finals MVP. Miabag kaniya sila si Rey Gonzaga ug JK Gonzaga nga mitali og 12 puntos matag usa.
Si Braven Padayogdog miposa og 21 puntos alang sa Cabangahan. Taliwala sa ilang kaparotan, mapasigarbuhon gihapon si Padayogdog gumikan kay siya man maoy gitunolan sa regular season MVP award nga mo-average og 17.8 puntos matag duwa.
Sa SK Category B, si Jade Goc-ong maoy nangu sa Tilhaong bitbit ang 25 puntos. Miposte siya og average nga 15.6 puntos matag duwa aron pagharos sa duha ka dungog isip regular season ug Finals MVP.
Ang usa ka bulan nga torneyo nga nagdugang og kasadya sa tinuig nga pista sa Consolacion karong Oktubre 29 agi’g pahinungod sa mahal nilang patron nga si San Narciso, nagmalampuson gumikan sa suporta nilang Mayor Teresa ‘Nene’ Alegado ug Vice Mayor Rey Damole ug ingon man sa maabtik nga sports committee pinangulohan nilang konsehal Nilo Ferraren ug Boy Tibon ug ABC President Marilou Casul.
Ang mga duwa gipadagan ubos sa superbisyon ni league commissioner Paul Alelu Q. Flores, kanhi star player sa Far Eastern University (FEU) Tamaraws sa dihang nagduwa pa siya sa UAAP, inabagan ni technical committee head Aurelio Eslawan.