CEBU, Philippines - Human sa ilang pagtimbaya atol sa pormal nga seremonyas sa pagbukas kagahapon, mainit nga aksiyon ug hugot nga kompetisyon na maoy atimanon sa kapin sa 2,000 ka mga atleta ug coaches lukop nasud gumikan kay ang mga duwa sa 7th National Milo Little Olympics kumbatihan na sugod karong adlawa sa duha ka managlahing dapit didto sa probinsiya sa Laguna.
Ang Team Visayas nagpanikad na nga mopakita og aksiyon uban ang paglaum nga masakmit ang korona sa maong tulo ka adlaw nga torneyo nga katapusan nilang natagamtaman niadto pang tuig 2011.
Bisan og gilangkuban og mga bag-ong nawong ug ingon man first-timers, si Visayas delegation head Ricky Ballesteros masaligon kaayo sa ilang kahigayonan nga mokampiyon gumikan kay gipanglupig man nila ang mga beteranong koponan ug atleta sa regional level ug hasta na sab gani sa Palarong Pambansa.
Miabot ngadto sa 15 ka sporting events, duha niini mga demo sports nga mao ang arnis ug karatedo ang banatan sa mga partisipante sa nagkadaiyang rehiyon sa nasud.
Ang mga duwa nga tigian sa Sta. Cruz mao ang medal-rich athletics ug swimming, badminton, basketball, football, gymnastics, sepak takraw, tennis ug volleyball, samtang ang Pagsanjan maoy mo-host sa chess, scrabble, table tennis ug taekwondo.
“The National Finals is the culminating event of the Milo Little Olympics, where champions are made. It will surely be another thrilling sporting event for our student-athletes and spectators alike,” matud pa ni Robbie de Vera, ang Milo Sports Executive. “The regional teams have been preparing hard for this and we will soon witness the fruits of their hard work. We would like to invite everyone to join us in Laguna as we watch school rivalries unfold and deserving athletes be recognized in the Milo Little Olympics National Finals.”
Ang Team Visayas maoy labing unang nikompleto og ‘grandslam’ human gidominar ang national finals gikan sa tuig 2009 hangtod sa 2011. Ang Bisdaks pakyas hinuon pag-angkon sa perpetual trophy nga ihatag lamang ngadto sa makasagunson og upat ka daog gumikan kay gihuboan man sila sa ilang korona sa National Capital Region niadtong 2012.
Sa miaging tuig, ang Team Visayas maoy naghari sa elementary level, apan naputol ang ilang misyon nga birahon ang overall title gumikan kay nalandig sila sa ikaduhang dapit sa secondary division.
Sama sa miaging unom ka edisyon, ‘points system’ gihapon maoy gamiton aron pagdeterminar sa overall champion.