CEBU, Philippines – Managsuong Epoy ug Danny Caballero ang nagkumbinar og 42 puntos alang sa CCR Cars nga midaog dayon batok sa St. Therese, 88-77 pagsugod sa Talisay Basketball Association (TBA) cagefest niadtong Domingo didto sa Talisay City Sports Complex.
Si Epoy ‘The Pistolares’ Caballero, kinsa mao sab ang tag-iya sa CCR Cars miratsada’g 24 puntos aron pangulohan ang iyang koponan, samtang ang iyang maguwang nga si Danny mikamada’g 18 puntos ug ingon man si Johnson Calub.
Ang tulo mao sab ang mibanat og maayo sa duwa aron palihian og daog ang CCR Cars ubos sa Division C. Mipakita sab og maayong performance si Randy Gavas nga miambit og 12 puntos ug Gilbert Briones nga miariya’g 10 puntos alang sa CCR Cars nga maoy nikontrolar sa duwa gikan sa pagsugod hangtod na sa pagkahuman.
Ang St. Therese gipangulohan ni Sammy Atillo nga miburak og 22 puntos, gisundan ni Allan Gonzaga sa iyang 20 puntos.
Sa laing duwa sa Division C, ang Park N’ Go ni team owner Romy Rama midaog sab human makaipsot sa overtime batok sa F/GES, 82-81.
Mipabuto og 22 puntos si Traya alang sa Park N’ Go, samtang sila si Lisondra Makong ug Alob parehong miantog og 19 puntos. Si Mars Bacho, kinsa maoy mihatod sa duwa ngadto sa overtime, 72-all mitikdol og 14 puntos.
Nangu sab sa naparot nga F/GES mao si Romy Ruales sa iyang 24 puntos, si Raul Briones miamot og 20 puntos, samtang sila si Lito Piloto ug Tony Malaga mitimbre’g 15 ug 13 puntos.
Sa Division B, ang Kwarta Padala nakaipsot sab batok sa Warriors, 100-99.
Si Bobot Labuca nga maoy nahimong bida sa kadaugan miposa’g 20 puntos, gisundan ni Bong Hermosa sa iyang 16 puntos. Pareho sab nga mitampo’g 14 puntos sila si Junjun Bascon ug Gabasa.
Sila si Jimboi Cabanes, Gabriel Bonjoc ug Junrey Labajo mao sab ang nangu sa Warriors nga parehong miiskor og 20 puntos, gisundan ni Rey Abarquez nga adunay 14 puntos ug Junjun Bonjoc sa iyang 10 puntos.
Sa Legends division, ang Alaska yano kaayong miiskor og daog pinaagi sa paglubong sa TNT, 82-64.
Upat ka players sa Alaska ang miiskor og double figures pinangulohan ni Doming Cabigas sa iyang 17 puntos.
Samtang upat sab ang mihimo’g double digits alang sa TNT. Si Mar Kong mitikdol og 18 puntos, sila si Loloy Macaraya ug Fred Cabasa miabuno’g 14 puntos matag usa, samtang si Bogs Cañizares miantog og 10 puntos. (BANAT NEWS)