CEBU, Philippines – Dili na gyud kapugngan, mosikad na ang 41st season sa PBA diin magsangka ang Rain or Shine Elasto Painters ug Star Hotshots karong adlawa didto sa Mall of Asia Arena.
Ang opening gitakda unta niadtong Domingo, apan gisibog kini tungod sa bagyong Lando.
Gipahibalo sab kagahapon sa PBA Commissioner’s office nga ang kitaon sa ticket sales sa openingkaron ihatag ngadto sa mga biktima sa bagyong Lando nga mikuso-kuso didto sa Luzon.
Sa dili pa ang sangka sa Painters ug Hotshots sa alas-7 sa gabii, usa ka engrandeng opening ceremony ang ipahigayon diin usa sa mga highlights ang pagparada sa mga koponan uban sa mga celebrity muses.
Tungod sa pagkasibog sa ilang engkuwentro niadtong Domingo, mas agresibo nga Rain or Shine ug Star players ang gilauman nga mosalida karon ilabi na nga ilogan nila ang unang daog sa All-Filipino Cup.
Ang Painters nga midawat na sa kamatuoran nga dugay pa kaduwa uban kanila ang point guard nga si Paul Lee tungod sa injury pabiling malaumon sa ilang kahigayonan karon nga conference tungod sa ilang No. 3 pick nga si Fil-Nigerian Maverick Ahanmisi.
Masukod karon ang abilidad ni Ahanmisi tungod kay ikaatbang niya ang mga veteran guards sa Star sama nila ni Mark Barroca, Alex Mallari ug Justin Melton.
Ang Star mosuway og pakita sa ilang maayong performance ubos sa bag-o nilang coach nga si Jason Webb, kinsa mipuli ni Tim Cone. (BANAT NEWS)